ترسندوک

ساخت وبلاگ


کَلّه وِسِن

اون قدیما که پچوک بیمی مارون برای اینکه اما ره از کاری منع هاکنن به هر طریقی و با موجودات افسانه ای اما ره ترس دانه ،مطمئنا"اولین موجودی که به ذهن شما رسنه "کلّه وسن"هسته

کلّه وسن چچی هسته؟ 

کلّه وسن موجودی بیه بوم سر دئییه و وقتی وچون خواستنه بورن بوم دلیکی  هاکنن وشون کلّه ر کندی یه اما هم واقعا"ترسیمی و بوم سر نشیمی، اتّآ کمه که گتّر بئیمی  و چند بار بوردمی بوم دیگه امه وسّه عادی بئی یه و بدیمی  اصلا"خَوِری از" کلّه وسن"نییه. 

 یک سر دِ گوش

حتما سوال کنّی همه موجودات اتّا سر و دِ تا گوش دارنّه، اما قضیه این حیوون افسانه ای فرق کرده. نقل کردنه ونه گوش اینقدر گت بیه خواسته بخسه اتا گوش ره شه پلی مال (زیر انداز) کرده و اتا گوش دیگه ره شه سر کشیه (دوآج) اگه وچون بورد بون بوم سر ، یک سر ده گوش وشون ره خرده. 

پوست ها کرده پلنگ

حتما تعجب کنی وه دیگه چچی هسته . اما اتّا کمه که گت تر بئیمی و بقول قدیمی راه شو و مله مله شو بئیمی ، مله که شیمی، مارون برای اینکه اماره وادار هاکنن قبل از تاریکی بئیم سره، گوتنه فلون جا (مشتی شرآقا دایی) سره پشت پوست هاکرده پلنگ دره و شما ره خرنه. اما هم چون پچوک بیمی و انده فکر نکردمی پلنگ ره پوست هاکنن مییرنه و زنده نموندنه ولی با این همه حرفها ترسیمی و همیشه قبل از تاریک بئیین هوا امومی سره.

آخی واخی

اون قدیما که پیر و مار باغ دله کورگندم (ذرت) کردنه اما شیمی کورگندم ره چیمی و کورگندم بئو (پفیلا) درست کردمی، مار برای اینکه اما دیگه این کار ره نکنیم گوته باغ دله (آخی واخی) دره شما ره خرنه. وقتی گوتمی وه چچی هسته؟ گوتنه حیوونی هسته که ونه وچون ره آدم بکوشته همینجور که آخ و واخ کنده و دِ دستی شه دیم ره چنگلی زنده برای اینکه از آدما انتقام بئیره شونه کورگندم جار دله جا خرنه و آدم ره خرنه.

اتفاقا یک بار بوردمه کورگندم بچینم بدیمی یک موجودی سیاه پوش دِ دستی شه دیم ره چنگلی زنده و آخ و واخ کنده، فرار هاکردمه و دیگه اون باغ وری نشیمه (بعدا مار تعریف هاکرده یک نفر ره بائوته اتا چادر سیو سر هائیره اماره ترس هاده)

اسا وچون اتا بامشی کته، بز کته و حتی چیندکا جه ترسنّه. مره یاد نشونه چند سال پیش مه برارزا که وچه بیه خله شیطونی کرده و هی کاتی سر جه شییه بوم،  هرچی وره گوتمی وچه کفنی ته دست و لینگ اشکنه قبول نکرده تا اینکه من باتمه دتر بوم سر ((کله وسن)) دره و وقتی داستان ره ونه وسته تعریف هاکردمه، اون شو تا صواحی همینجوری پشه (هذیون) گوته و بوم ره نشون دائه گوته :کله وسن داره میاد... تا د سه ماه نصف شو خو دله راست بیه و در و پنجره ره نشون دائه گوته کله وسن داره میاد...

تا اینکه بعد از مدتی بوردمی مله، من باتمه دتر خوانی اتا جا با هم بوریم؟ وره کشه هائیتمه بوردمی بوم سر، باتمه بوین دتر این هم بوم بدی هیچی دنیه؟فقط خواستمه تره ترس هادم بوم نشوئی و کاتی سر جه نکفی

 نویسنده علی برزگر ولیکچالی 

نِنِا ( مادر )...
ما را در سایت نِنِا ( مادر ) دنبال می کنید

برچسب : ترسندوک, نویسنده : cbenaft2 بازدید : 157 تاريخ : پنجشنبه 2 آذر 1396 ساعت: 3:49